Pig-sierto kan Malacañang na suportado ni Presidente Ferdinand Marcos Jr. an ipinapanukalang anti-espionage bill na naaprubahan na kan Kamara sa ikatolong asin pinal na pagbasa.
Bukas man an Malacañang sa posibleng pag-amyenda kan presenteng Anti-Espionage Law matapos aprubahan kan Kamara sa ikatolong asin pinal na pagbasa an panukalang ley na nagmamawot na pakusugon an ley kontra sa espionage.
Segun ki Presidential Communications Office asin Palace Press Officer Undersecretary Claire Castro, dai pa nahihiling ni Presidente Ferdinand Marcos Jr. an bersyon kan panukala na ipinasa kan Kamara kaya mayo pa ini nin pinal na posisyon.
Siring man, sinabi ni Castro na susurihon kan Presidente an laog kan panukala, partikular kun kaipuhan an mga pagbabago tanganing matugunan an mga bagong paagi kan espionage asin iba pang gibo na pwedeng makadanyar sa seguridad kan nasyon.
Tinawan-duon ni Castro na dai gusto kan Presidente na igwang mga Pilipinong magtraydor sa nasyon asin sa kapwa Pilipino.
Dugang pa kaini, kun mahihiling na makakamaray sa nasyon asin tama an laog kan panukala, dai ini hahadlangan kan Presidente.
Sa presente, hinahalat pa kan Malacañang an pinal na bersyon kan panukala bago magtao nin mas seguradong posisyon manungod digdi.
