Personal na nagpahiling giraray si dating Presidente Rodrigo Duterte sa International Criminal Court (ICC) kan Martes, ini an ikaduwang beses sa laog nin duwang bulan, manungod sa kasong crimes against humanity na saiyang kinakahampang huli sa saiyang kampanya kontra droga.
Nag-atendir si Duterte sa ika-4 na status conference na an katuyuhan iyo an pag-areglo kan mga detalye asin pagpreparar para sa paglilitis. Nakatukaw siya sa likod kan saiyang mga abogado asin naggamit nin headset mantang nagpuon an pagdangog.
Nag-atendir na si Duterte sa mga pagdangog sa paagi kan video link matapos siyang darahon sa The Hague. Dai man siya nag-atendir sa nagkapirang nakaaging pagdangog bago personal na nagpahiling sa ikatulong status conference kan kaso kan Setyembre.
Kinakahampang kan dating presidente an tulong bilang kan crimes against humanity. Segun sa mga prosecutor, may kinalaman daa siya sa dai mababa sa 76 na paggadan poon 2013 sagkod 2018 sa tahaw kan saiyang kampanya kontra sa mga paragamit asin paratinda nin ilegal na droga.
Itinugdas kan ICC an Nobyembre 30 bilang pagpuon kan paglilitis, na posibleng maghaloy nin pirang bulan o taon.
