Nakatalaan na magpresentar an prosekusyon kan International Criminal Court (ICC) nin limang testigo sa paglilitis kan kasong crimes against humanity laban ki dating presidente Rodrigo Duterte bago an Christmas recess kan korte.
Segun ki Senior trial lawyer Julian Nicholls, linalaoman na personal na matestigo sa The Hague an mga testigong tinawan nin protective codes, apwera na sana kun magkaigwa nin dai linalaoman na problema sa pagpreparar.
Pwede sindang magtao nin live testimony o gumamit nin mga naenot nang nakasurat na pahayag susog sa ICC rule 68.
Pinag-ulayan man sa status conference an paggamit kan prosekusyon nin open-source materials, kaiba an haros 1,000 na clipping kan mga peryodiko manungod sa mga paggadan sa Davao City kan alkalde pa si Duterte.
Kinuwestiyon ni presiding judge Joanna Korner kun kaipuhan na isama an gabos na nasabing report sa opisyal na rekord kan paglilitis.
Depensa pa ni Nicholls, importante an mga dokumento huli ta tinipon daa an mga ini kan panahon na mayo nin opisyal na ahensya na sistematikong nagtatala nin mga extrajudicial killing.
Segun saiya, pwede man ining may koneksyon sa isyu kan kaaraman asin kamalayan kan mga namomoon kaidto.
Mantang, sinabi kan defense team ni Duterte na sobra na sa 18,000 item an listahan kan ebidensya, kaiba an sarong data set na igwang 8,393 item hale sa mga operasyon kan Philippine National Police poon Hulyo 2016 sagkod Nobyembre 2017.
Inenkaminar kan mga hukom an prosekusyon na bawasan pa an mga duplicate na dokumento tanganing mapagdanay na nakasentro sa importanteng ebidensya an paglilitis.
