Sinimbag ni National Bureau of Investigation (NBI) Director Atty. Melvin Matibag an pag-apod saiya ni Vice President Sara Duterte bilang sarong ‘nobody’.
Inako ni NBI Dir. Matibag na masasabi siyang ‘nobody’ partikular kun an basehan iyo an pagkaigwa nin mansyon asin negosyo.
‘Nobody’ man daa siya kun an pinagbabasehan iyo an nakakua nin kwarta hale sa Chinese state-owned companies.
Mientrastanto, nagtao ini nin kasiguraduhan na padagos an pagtupad kan kawanihan sa mandato kaini asin dai mahihimo an imbestigasyon.
Magigirumduman na sinabi ni Vice President Sara Duterte na dai siya interesado sa nasabing direktor matapos siyang hagadon na magsumite nin kaso kun igwa man nin sala sa saindang ginigibong imbestigasyon.
Igwa na daa nin forum sa Office of the Ombudsman asin Senate Impeachment Court tanganing matanos na simbagan an mga alegasyon manungod sa saiyang SALN o Statement of Assets, Liabilities, and Net Worth.
Kun babalikan, sa nakaaging press conference kan National Bureau of Investigation, inimbitaran kan direktor an bise presidente na magsumite nin habla asin idaan sa tamang proseso an pagkuwestyon sa saindang imbestigasyon.
