Piglalaoman na magigin key witness si NBI Director Melvin Matibag sa maabot na Impeachment Trial hearings may kinaaraman sa Article 4 kan Articles of Impeachment laban ki Bise Presidente Sara Duterte.
Sa intrevista kan Bombo Radyo Naga kay Rep. Renee Co (Kabataan Partylist), piglalaoman na maipresentar ni Matibag an resulta kan bilog na imbestigasyon kan National Bureau of Investigation (NBI), kabali na an mga findings manungod sa mga pahayag ni Duterte na iyo an nagin basehan kan imbestigasyon.
Sinabi ni Co na dati nang iprinesentar an affidavit of investigation asin iba pang evidencia, alagad piglalaoman na matao nin mas malinaw na paliwanag si Matibag sa enterong imbestigasyon na ginibo kan NBI.
Idinugang pa kan mambabatas na preparado an House Prosecution Panel na magpresentar kan mga testigo asin evidencia susog sa schedule na itinalaan kan impeachment court ngani na masierto an marahay na dalagan kan pagbista.
