1PWD Party-list Representative JD Castro, pormal na naghain nin reklamo sa National Bureau of Investigation (NBI) sa Pasay City kontra sa mga host asin producer kan sarong podcast.
Ini huli sa mga insensitibo asin dai akseptableng pagtataram kan programa na nagtutukoy ki Josh Aquino, an panganay na aki ni Kris Aquino na nasa autism spectrum.
Segun ki Castro, an saiyang reklamo nakabase sa pagbalgar kan Republic Act No. 9442, an ley na nag-aamyenda kan Magna Carta for Disabled Persons (Republic Act No. 7277).
Sa irarom kan nasabing ley, ipinagbabawal asin may kaukulang penalidad an anuman na klase nin panlalait, diskriminasyon, asin paninira sa mga taong may kapansanan o persons with disability (PWD).
An sinuman na mapapatunayan na nagkasala sa enot na beses pwedeng patawan nin multa na P50,000 sagkod P100,000.
Dugang pa digdi, igwa man nin posibilidad na makulong nin anom na bulan sagkod duwang taon.
