Nakatalaan na magsumite an House prosecution panel kan saindang formal offer of evidence sa impeachment court bago an itinalaan na deadline sa aga, Biyernes, Oktubre 23, segun ki Batangas Rep. Gerville Luistro.
Pagkatapos kaini, igwa an kampo ni Vice President Sara Duterte nin 10 aldaw tanganing magsumite nin komento o pagkontra sa mga ebidensyang iprinisentar kan prosekusyon.
Kaiba sa mga ebidensyang iprinisentar iyo an mga rekord sa bangko, buwis, asin korporasyon na may koneksyon sa mga alegasyon nin unexplained wealth laban sa Bise Presidente.
An pagsumite kan formal offer of evidence an piglalaoman na matapos sa presentasyon kan ebidensya kan prosekusyon bago an masunod na yugto kan impeachment trial.
Nagpromesa man si Luistro na isusumite sa Office of the Ombudsman an mga ebidensyang nakua laban sa Bise Presidente, asin idiniin na dai ini masasayang sa ibong kan pag-atras sa tulo sa apat na artikulo kan impeachment.
Mantang, pinahimutikan ni House impeachment spokesperson Robert Ace Barbers an mga alegasyon na pigmamadali an “impeachment trial” ni Vice President Sara Duterte bago an itinalaan na pagbisita ni US President Donald Trump sa Pilipinas para mag-atender sa ASEAN summit.
Segun ki Barbers, nakabase sa napagkasunduan na iskedyul kan prosekusyon asin depensa an paglilitis pagkatapos kan pre-trial conference kun sain pinag-ulayan an mga testigo asin ebidensyang ipiprisentar.
Nakatalaan na magpadagos an paglilitis sa Nobyembre 9 pagkatapos halion an tulo sa apat na impeachment article.
Idinuon ni Barbers na mayong halong pulitika an paglilitis asin katuyuhan sana kaini na panaguton an mga opisyal kan gobyerno, mantang ipinahayag man ni Rep. Luistro na mayo sindang kapangyarihan na madalian an proseso kan impeachment trial.
