Padagos an pag-apela ni Navotas City Rep. Toby Tiangco na tulos nang maipasa an Citizen Access and Disclosure of Expenditures for National Accountability (CADENA) Act.
Nagtutubod an kongresista na sa paagi kaini, mapapangatamanan an transparency asin paninimbagan sa gobyerno.
An kawaran daa nin transparency sa gobyerno, orog na sa paggastos nin pondo, nagiging rason tanganing magin kahina-hinala an mga nakatukaw na opisyal.
Kaya an saiyang apela na ini mag-uswag na sa Kamara de Representantes, orog na ta naaprubahan na an panukala na inakda ni Sen. Bam Aquino sa ikatulong asin huring pagbasa kan Senado.
Sa paggamit kan teknolohiyang ‘blockchain’, magkakaigwa nin ‘access’ asin masusubaybayan pa kan publiko kun paano ginagastos kan gobyerno an pondo kan banwaan.
Apwera kaini, mapapakusog man daa an mga institusyon, masisiguro an paninimbagan, asin mapapatibay pa an tiwala kan publiko sa gobyerno.
Huli kaini, kaiba an iba pang mga mambabatas arog ninda Marikina Rep. Marcy Teodoro asin Sen. Bam Aquino, pareho nindang hinahagad na aksyunan na an nakabinbing panukala.
