Pigkontra kan defense team ni dating Presidente Rodrigo Duterte an kahagadan kan prosekusyon kan International Criminal Court (ICC) na akuon bilang ebidensiya an mga naenot nang nairekord na testimonya kan duwang saksi sa kasong crimes against humanity na saiyang kinakahampang.
Iginiit kan depensa na dapat magsairaraom sa cross-examination o paghahapot nin balyong lado sa korte an nasambit na mga saksi.
Sa sarong pampublikong dokumento na may mga parte na dai ipinahayag, na may petsang Oktubre 26, hinagad kan depensa sa ICC Trial Chamber III na isikwal an kahagadan kan prosekusyon na akuon an mga naenot nang nairekord na testimonya kan mga saksi na sinda P-1393 asin P-1416.
Siring man, mayo man nin pagkontra an depensa sa pag-ako bilang ebidensiya sa testimonya kan ikatulong saksi na si P-1370.
Segun sa depensa, nagtatalakay an mga testimonya ninda P-1393 asin P-1416 an mga pinagdedebatihan na isyu na importante sa kaso. Huli kaini, iginiit ninda na kaipuhan pang mas masusing surion asin tanawon an mga saksi tanganing matantya an kredibilidad kan saindang mga salaysay.
Hinagad kan prosekusyon na akuon bilang ebidensiya an mga naenot nang nairekord na testimonya kan tulong saksi susog sa Rule 68(2)(b) kan Rules of Procedure and Evidence kan ICC. Pinapahintulutan kan nasambit na tuntunin an pag-ako sa mga naenot nang nairekord na testimonya sa irarom kan mga partikular na kondisyon, dawa dai maghampang sa korte an saksi.
