Pig-iimbestigaran kan Philippine Coast Guard (PCG) an gamit asin kakayahan kan sarong dai maaraman na kagamitan na nahiling sa sarong barko sa laog kan lagoon kan Bajo de Masinloc sa West Philippine Sea.
Enot na nahiling kan Oktubre 3 an barkong asul asin puti na may hila-hilang mas sadit na speedboat asin sarong kolor kahel na bagay na garo bangka asin mayong bintana sa likod na parte kaini.
Segun ki PCG spokesperson para sa West Philippine Sea Rear Admiral Jay Tarriela, dai pa segurado kun an barko sarong Chinese research vessel base sa bow number asin IMO number kaini.
Pig-aaram man kun an kolor kahel na kagamitan sarong submersible o ginagamit sa mga operasyon sa irarom kan dagat.
Sinabi ni Tarriela na posibleng ginagamit an kagamitan sa marine scientific research, kaiba an pag-adal sa seabed o paggamit nin underwater drones.
Nakadangog man an PCG nin mga ribayan nin mensahe sa radyo kan mga puwersang Tsino asin kan eroplano kan Bureau of Fisheries and Aquatic Resources mantang nagpapamahala nin patrol.
Apwera sa nasambit na barko, nahiling man sa lugar an limang Chinese maritime militia vessel, tulong barko kan China Coast Guard asin sarong warship kan People’s Liberation Army Navy.
P
