Nangangapudan an mga biktima kan ‘war on drugs’ sa administrasyon ni Presidente Ferdinand ‘Bongbong’ Marcos Jr. na ipautob tulos an ‘arrest warrant’ kan International Criminal Court (ICC) kontra ki Senador Bato Dela Rosa.
Hagad ninda na arestuhon asin isuko si Senador Dela Rosa sa ICC o sa The Hague, Netherlands.
Si Senador Dela Rosa saro sa mga pinangaranan na ‘co-perpetrator’ ni dating Presidente Rodrigo Roa Duterte sa kasong ‘crimes against humanity’ huli sa pagpautob kan madugong ‘war on drugs’.
Padagos an paghahanap kan mga awtoridad sa senador poon kan iluwas an ‘arrest warrant’ hale sa ICC.
Nagtao man an Department of Interior and Local Government (DILG) nin 50-milyon pisong pabuya para sa makakapagtukdo kan saiyang lokasyon.
Alagad, segun ki Atty. Gilbert Andres, ICC Common Legal Representative for Victims, magigin epektibo sana an mga ginigibong aksyon kan gobyerno kun madara si Senador Bato sa ICC.
