Kinumpirma ni US President Donald Trump na an militar kan Estados Unidos an nagsagibo kan saiyang inapod na “minor strike” kontra sa “air defense system” kan Iran sa Qeshm Island, na namumugtak sa Strait of Hormuz.
Sa ibong na lado, ipinahayag kan estado kan media sa Iran an pag-atake sa Suza area, kaiba an pahayag kan saindang hukbo na matrayumpo nindang napabagsak an sarong American MQ-9 drone sa nasambit na isla.Konektado digdi, ilinadawan kan US Central Command (CENTCOM) na nagdadanay na matuninong an sitwasyon alagad naghabo na magtao nin dugang na detalye manungod sa insidente.
Sa paagi kan sarong post sa X, nag-alok man an CENTCOM nin reward na sagkod $20 million asin posibleng relokasyon para sa makakapagtao nin impormasyon manungod sa “nuclear program” asin mga siyentipiko kan Iran.
Sa ibong kan mga pag-atake, iginiit ni Trump na padagos an pakikipag-ugnayan kan saiyang administrasyon sa mga representante kan Tehran asin igwa nang dakulang pag-uswag sa mga negosasyon.
Kinontra man kan gobyerno kan Qatar an mga bareta na nagpalya na an pag-urulay kan duwang nasyon asin nagbabala na ini nakakaraot sa katuninungan sa rehiyon.Ipinagpaliwanag ni Qatari Prime Minister Sheikh Mohammed bin Abdulrahman Al Thani na padagos an saiyang pakikipag-ugnayan sa Washington asin Tehran tanganing malikayan an dagusan na paglala kan krisis.
Mantang, nagdadanay man na nakapreparar an rinibong tropa asin mga barkong pandigma kan Estados Unidos sa Middle East kun sakaling mag-orden an presidente nin mas dakulang operasyong militar.
