Isinusulong ni Naga City Mayor Leni Robredo ang pagpapalawak ng paggamit ng solar energy sa mga gusaling pag-aari ng lokal na pamahalaan upang makatulong sa pagtitipid sa konsumo ng kuryente at pagpapababa ng gastusin ng lungsod.
Ayon kay Robredo, nakatakdang magkaroon ng ceremonial turn-on ng mga solar panel sa Nobyembre 23, kasunod ng pagkakabit ng mga kagamitang ipinagkaloob ng mga donor. Plano rin niyang palawakin pa ang paggamit nito sa iba pang pasilidad ng pamahalaang lungsod.
Kabilang sa mga gusaling mayroon nang solar panels ang Metro Naga Sports Complex at ang dormitory. Hinikayat din ng alkalde ang Department of Public Works and Highways (DPWH) na isaalang-alang ang paglalagay ng solar panels sa mga kasalukuyan at susunod na proyekto ng ahensya.
Iminungkahi rin ni Robredo ang salit-salitang paggamit ng solar energy at kuryente mula sa grid sa ilang pasilidad, kabilang ang mga event center at iba pang gusali ng lungsod. Layunin nitong mabawasan ang gastusin sa kuryente habang natutugunan ang pangangailangan sa suplay ng enerhiya.
Ibinahagi rin ng alkalde na nakapagtala na ng pagtitipid sa konsumo ng kuryente dahil sa paggamit ng solar energy, na umaabot umano sa 40% sa ilang pagkakataon. Patuloy namang pinag-aaralan ng lokal na pamahalaan ang mga posibleng hakbang upang mapalawak ang paggamit ng renewable energy sa iba’t ibang pasilidad ng lungsod.
