Nanawagan si Senate President Win Gatchalian sa pamahalaan na agarang magpatupad ng mga hakbang upang pasiglahin ang ekonomiya ng bansa kasunod ng pagbaba ng Gross Domestic Product (GDP) sa 2.1% noong ikatlong quarter ng taon.
Ayon kay Gatchalian, malaking salik sa paghina ng lokal na produksyon at ekonomiya ang patuloy na pagtaas ng presyo ng enerhiya at matinding epekto ng El Niño phenomenon.
Binigyang-diin niya ang pangangailangan para sa mga konkretong programa at agarang aksyon ng pamahalaan upang muling mapabilis ang paglago ng ekonomiya.
Kaugnay nito, gagawing prayoridad ng Senado, sa pamamagitan ng RISE Ad Hoc Committee, ang pagsusulong ng mga hakbang na makatutulong sa pagpapalakas ng ekonomiya.
Kabilang sa mga pangunahing hakbang ang pagpapabilis ng paggasta ng gobyerno, lalo na sa mga mahahalagang proyektong pang-imprastraktura, at pagpapalawak ng mga social protection program para sa mga sektor na higit na nangangailangan ng suporta.
Dagdag pa ni Gatchalian, sisiguraduhin din ng Senado na mabibigyan ng sapat na pondo ang mga probisyon sa panukalang pambansang budget na direktang makatutulong sa pang-araw-araw na pangangailangan ng mga Pilipino, lalo na sa gitna ng patuloy na pagtaas ng presyo ng mga pangunahing bilihin.
