Isinapubliko na an inisyal na balangkas kan binilog ni Presidente Ferdinand Marcos Jr. na sarong fact-finding body na inapod na Independent Commission for Infrastructure (ICI) sa paagikan Executive Order No. 94.An ICI an igwang mandato na imbestigaran an mga iregularidad, salang paggamit kan pondo, asin posibleng korapsiyon sa mga proyekto kan gobyerno, partikularmente sa flood control, sa nakalihis na 10 taon.
May kapangyarihan ining:
– Magluwa nin subpoena
– Magrekomendar nin kaso sa DOJ, Ombudsman, asin Civil Service Commission
– Mag-freeze nin assets asin magluws nin hold departure orders
Itinalaga komo mga commissioner sinda Rogelio “Babes” Singson, dating DPWH Secretary asin Rossana Fajardo, managing partner kan SGV & Co. asin saro pang dae muna pinangaranan na matindog na chairman kan lupon. Mientrastanto si Mayor Benjamin Magalong kan Baguio City, masirbing special adviser sa komisyon.
An komisyon, binilog makalihis mabunyag an mga “ghost projects” sa flood control na mag-abot sa P100 bilyon na kontrata.Sa mga pagdangog sa Senado asin Kamara, nagkapirang contractor asin dating opisyal kan DPWH an nagbunyag nin mga kickback scheme na soboot kinaiimbweltuhan kan nagkapirang lehislador.
Sigun ki Presidente Marcos, an ICI an “truly independent” tanganing masierto an integridad kan imbestigasyon.
An komisyon, magsusumiter kan regular na report sa Office of the Presidente asin magtinir hasta makalihis an mandato kaini o kun ini buwagon kan Presidente.
