Kinondenar kan transport group na Piston an panibagong paglangkaw kan presyo kan produktong petrolyo na pig-implementar ngunyan na semana, na nagpalangkaw nin haros P3 sa diesel.
Sa intrevista kan Bombo Radyo Naga ki Mody Floranda, Presidente kan Condor-Piston, tinawan duon kaini na magabat na pasanon ini sa mga drayber asin sa publiko, urog na dae pa nakakabangon an sektor sa mga nakaaging paglangkaw kan presyo. Dawa ngani nagkaigwa nin rollback sa mga nakalihis na semana, mantenidong halangkaw an presyo kan diesel asin gasolina kumpara sa nakaaging lebel antes an global tensions.
Dugang pa ni Floranda na igwa nin bastanteng supply nin petrolyo an nasyon base sa datus hale sa Department of Energy, kun kaya pigkwestyon ninda kun tano ta padagos an paglangkaw kan presyo. Pigtawan duon kaini na pinapabayaan na sana kan gobyerno asin mga kompanya nin langis na magdikta kan presyo sa merkado.
Tinatsaran man kan grupo an soboot kawaran nin konkretong polisiya kan administrasyon ni Ferdinand Marcos Jr. sa sektor nin enerhiya, partikularmente sa pagkontrol kan presyo kan langis.
Sa ibong kaini, sinabi ni Piston na padagos sindang magkakaigwa nin mga aksyon protesta tanganing ipirit an saindang mga kahagadan, kabali na an pagbasura kan Oil Deregulation Law asin an implementasyon kan mas hababang presyo kan petrolyo.
Idinagdag pa ni Floranda na an lambang paglangkaw kan presyo nin langis direktang nakakabawas sa kita kan mga drayber, na may kinakarkulong pagkalugi na haros ₱90 kada aldaw para sa sarong drayber na nagkokonsumo nin 30 litro nin diesel.
Nangapudan man si Floranda nin pagkasararo kan transport sector tanganing ipaglaban an saindang kabuhayan asin deretso, kasabay kan pangapudan sa gobyerno na gumibo nin tulos na lakdang tanganing mapundo an padagos na paglangkaw kan presyo kan langis.
