NAGA CITY – LIWAT na pinagirumduman kan alkalde kan banwaan nin Goa, Camarines Sur an gabos kan saiyang mga nasasakupan na kun enkaso igwang dae pagka-irintindihan dapit sa daga o anupaman na bagay, agihon soboot sa tamang pag-urulay asin likayan an paggamit nin dahas.
An nasambitan ng kapahayagan an katakod kan nangyaring krimen kan nakalihis na Sabado kun saen tinaga asin pinutulan pa nin payo an sarong babae kan saiya man sanang sadiring bayaw.
Sa entrevista kan Bombo Radyo Naga ki Mayor Marcel Pan kan banwaan nin Goa, sinaysay kaini na mayong nadadarang karahayan kun papairalon kan sarong tawo an saiyang labing kaangutan sa iba.
Makawsa sana soboot ini nin salang desisyon asin mabubugtak an sarong indibidwal sa bakong magayon na sitwasyon.
Katakod kaini, sigun sa alkalde, antes soboot an insidente kinaulay pa kaini an duwang lado na imbwelto sa nasambitan ng problema asin pigkaulay an mga ini na agihon sana sa pag-urulay an dae pagka-irintindihan dapit sa daga.
Alagad kan mahiling soboot kan opisyal na dae maagi sa pag-urulay sana an problema, pigsuhestyon kaini sa duwang lado na aregluhon an problema sa legal na paagi.
Pig-ako man kan alkalde na an iringan kan duwang lado dapit sa daga an haloy naman alagad dae soboot ini naglalaom na mapuli sa siring na makamundong pangyayari an problema.
Sa ibong na lado, basado soboot sa Municipal Agrarian Officer kan saindang banwaan, nagluluwas na huri na an dead of seal kan biktima, kun saen an pinag-iiriwalan na 2 ektarya kan daga an na-award na kan DAR sa mga Panuelos.
Boot sabihon, mayo soboot derechos an biktima sa nasambitan ng daga. Mientrastanto, pigpapabantayan man kan alkalde sa mga kapulisan an pamilya kan biktima orog na an mga aki nin huli ta posible soboot an mga ini na magbalos sa pamilya kan suspek.Sa ngunyan, nagrequest naman soboot nin financial assistance an alkalde tanganing maitao sa pamilya kan biktima.
