Mas dakula an tyansa na magpadagos an prosopwestong Anti-Political Dynasty Bill, kasunod kan pahayag kan Malacañang na pigsusuportaran kaini an pagpasar kan nasambitan ng ley.
Ini an nahihiling ni Senador Bam Aquino — na aminadong parte man kan political family.
Sigun ki Aquino, antes magluwas an anunsiyo kan Palasyo, pighuna kaining “masakit” pa man na maipasar an prosopwesto maski nakapagsunad na man sinda nin sadiring bersiyon.
Sa hapot man kun oras na tanganing sertipikaran komo urgent an Anti-Political Dynasty Bill, sinaysay kan senador na alagad maski positibong simbolo kun ideklarar ining urgent, dae pa ini kinakaipuhan sa ngunyan.
Naglalaom si Aquino na sa enot na parte kan masunod na taon, mailuluwas na an committee report kan bill tanganing mapuonan na an deliberasyon.
Aminado man si Senator Kiko Pangilinan na dae magigin madali an pagpasar kan Anti-Political Dynasty Law, orog na ta apat na dekada na ining nakabinbin.
Alagad maski haloy nang nakabinbin, nangapodan an senador na suportaran kan mayorya sa Kongreso an pagpadagos kan bill, kasabay kan pagsabing nag-abot na sa committee report an prosopwesto asin dapat nang ibusol para sa plenary deliberations.
Hurot pa ni Pangilinan, igwang 10 petisyon na nakabinbin sa Korte Suprema na naghahagad na ideklarang taliwas sa Konstitusyon an political dysnaties.
Dapat na soboot pag-adalan asin pagdesisyunan ini kan mga mahistrado.
