NAGA CITY- Nagsuko an apat na miyembro kan New People’s Army (NPA) sa mga otoridad sa pigkundusir na operasyon sa probinsiya kan Camarines Sur, Masbate asin Sorsogon.
Sigun sa Police Regional Office Bicol saro sa mga nagsuko an binistong si alyas “Jay-Jay na miyembro kan Sub-Regional Committee 4 kan Bicol Regional Party Committee ) sa irarom kan pamamayo n Dindo Monsanto.
Bitbit kaini an sarong klase nin badil na kusang-boot man na pigturn-over sa mga otoridad.
Mantang si alyas Rob an nagsuko man sa may parte kan San Jacinto, Masbate.
Ini an konektado sa Milisyang Bayan, Larangan 4, Platoon 2, Komiteng Larangang Guerilla (KLG) North, SRC4, BRPC, sa irarom kan pamamayo ni Eliseo Cabarles na bistado komo Ka Kiko.
Sa banwaan man kan Sipocot, Camarines Sur, si alyas Jane na parte kan Platoon 3, SRC5, BRPC an nagsuko sa 1st Provincial Mobile Force Company personnel.
Sa Sorsogon, si alyas Nilo na parte kan Sandataang Yunit Propaganda (SYP) sa irarom kan Larangan Guerilla II, an nagsuko asin pigturn-over man an sarong klase nin badil.
An mga ini an presenteng nagsasairarom sa debriefing asin profiling asin nakatalaan na i-enroll sa Enhanced Comprehensive Local Integration Program (E-CLIP).
Sa ngunyan, padagos an pag-enkaminar kan mga otoridad sa Bicol Region para sa mga nagtitinir na miyembro kan mga rebeldeng grupo na kusang magbalik sa gobierno tanganing makabwelta man sa normal na pagbuhay.
