Gadan an army chief of staff kan Libya na si Mohammed Ali Ahmed Al-Haddad sa pagbagsak kan eroplano kan nakalihis na Martes makalihis na maghali sa Ankara, Turkey, sigun ki Prime Minister Abdulhamid Dbeibah.
Kaiba man sa eroplano an apat pang tao. Kaiba man sa lunad an commander kan ground forces kan Libya, direktor kan military manufacturing authority, sarong tagapayo kan chief of staff, asin sarong photographer gikan sa opisina kan chief of staff. Sigun ki Turkish Interior Minister Ali Yerlikaya, an Dassault Falcon 50 jet an naghali sa Esenboga Airport sa Ankara bandang 1710 GMT pasiring Tripoli.
Nawara an radio contact bandang 1752 GMT asin nadukayan an bangkay kan eroplano harani sa Kesikkavak village sa Haymana district. Naghagad an eroplano nin emergency landing sa ibabaw kan Haymana alagad mayong contact an naitatag. Dae pa malinaw an kawsa kan pagbagsak.
Nakipag ulay si Haddad sa Turkish Defence Minister Yasar Guler asin sa saiyang Turkish counterpart na si Selcuk Bayraktaroglu, kaiba an iba pang commander, sa saiyang pagbisita.
Nangyari an aksidente sarong aldaw makalihis palabaon kan parlyamento kan Turkey an mandato kan saindang tropa sa Libya kan duwang taon.
Suportado kan Turkey an Tripoli-based na internationally recognised government kan Libya sa militar asin pulitika, nagpadara nin tauhan kan 2020, asin nagtinta nin maritime asin energy accords, alagad kansuarin sana pinakusog man an koneksyon sa eastern faction kan Libya sa irarom kan “One Libya” policy.
