Mayo pang impormasyon an legal counsel ni Sen. Ronald Dela Rosa na si Atty. Israelito Torreon manungod sa kun sain nagpoon an impormasyon na dagusan nang naaresto an saiyang kliyenteng senador.
Segun ki Atty. Torreon, sagkod ngunyan nagngangalast pa ini kun tano bigla na sanang nagluwas an naturang bareta asin kun sisay an nagpasimula kaini.
Paliwanag kan batikang abogado, kan magpoon nang magkalat an naturang impormasyon, tolo nang aldaw an nakakalihis, nakatanggap siya nin kadakol na mga kahaputan kun totoo nang naaresto an saiyang kliyente.
Alagad, mayo man nin ipinaluwas na impormasyon an mga awtoridad kan Pilipinas manungod kaini, sagkod na kinumpirma kan nagkapirang ahensiya kan gobyerno, kaiba na an Department of the Interior and Local Government (DILG) asin Department of Justice (DOJ), na dai talaga naaresto an senador.
Segun ki Atty. Torreon, huring beses niyang nakaulay si Sen. Dela Rosa kan enot na semana kan Mayo, kan huring beses man na nahiling ini sa Senado, kasunod kan liwat niyang pagluwas matapos an nagkapirang bulan na pagtatago.
Sa ngunyan, mayo na suboot komunikasyon si Atty. Torreon sa saiyang kliyente.
Mientrastanto, antes na nagtago an senador, naenot nang nag-execute si Sen. Dela Rosa nin tolong power of attorney na nagtatao ki Atty. Torreon nin sapat na awtoridad tanganing magtaram o mag-asikaso nin nagkapirang legal na usapin para sa interes kan senador.
