PORMAL nang itinao sa Senado an panukalang P7.2-trilyon na pambansang budget para sa taong 2027.
Personal na tinanggap ni Senate President Sherwin Gatchalian an kopya kan National Expenditure Program (NEP) kasuduma Martes, Agosto 11, sa sarong ceremonial turnover sa Senado.Kaiba ni Gatchalian sina Senate Finance Committee Chairman Senator JV Ejercito asin Senate Majority Leader Juan Miguel “Migz” Zubiri.
Pinangenotan man ni Acting Budget Secretary Kim Robert De Leon an seremonya, kaiba an iba pang mga opisyal kan Department of Budget and Management (DBM).Sigun sa panukalang budget, kabali sa mga prayoridad kan gobyerno an edukasyon, salud, social protection, pagkakan, imprastraktura, trabaho, digitalization, asin paghahanda para sa mga kalamidad.
Pinakadakula sa social services an nakalaang pondo na mapakol sa P2.456 trilyon.
Mantang nagtitiner na primerong prayoridad an edukasyon, kun sain ipigsuhestyon na itagama an P976 bilyon para sa Department of Education (DepEd).
May nakalaag man na dakulang pondo para sa health care, imprastraktura, agrikultura, transportasyon, asin pabahay.An National Expenditure Program an magserbing basehan kan Kongreso sa pagtalakay asin pagbilog kan 2027 General Appropriations Act o pambansang budget para sa masunod na taon.
