MAS pinakusog kan Department of Agriculture Bicol (DA Bicol), Department of Labor and Employment (DOLE), asin Technical Education and Skills Development Authority (TESDA) an pagtatarabangan tanganing matawan nin trabaho, skills training, asin livelihood opportunities an 311 disadvantaged asin displaced workers sa Bicol sa irarom kan TUPAD Program.
Sa intrevista kan Bombo Radyo Naga ki Lovella Guarin, Spokesperson kan Department of Agriculture Bicol, an isinagibong Orientation Seminar asin Memorandum of Agreement (MOA) Signing para sa Scaling Up DA-DOLE-TESDA TUPAD Collaboration Livelihood Enterprise Project kan Agosto 10, pormal na pinagtibay kan tolong (3) ahensya an saindang mga papel asin responsibilidad sa pagpautob kan programa.
An aktibidad na ini pinangenotan kan DA Bicol Research Division, kaiba an DOLE asin TESDA, na obhetong pagsararoon an employment assistance, skills development, asin agricultural support tanganing mas matabangan an mga benepisyaryo. An oryentasyon pinagpartisiparan kan 110 benepisyaryo gikan sa probinsya nin Camarines Sur.
Mientrastanto, sa iba pang mga probinsya, nagpopoon na man an implementasyon kan programa na kun sain 34 an napili sa probinsya kan Albay; 20 gikan sa Camarines Norte; 17 sa Catanduanes; 40 sa Masbate; mantang 90 man sa probinsya kan Sorsogon.
