SUPORTADO ni Senator Erwin Tulfo an imbestigasyon sa Pax Silica Hub na pinagpaplanuhan nang i-develop sa New Clark City, Tarlac.
Boot man kan senador na malinawan kun sain maghahale an dakulang suplay nin tubig asin kuryente na kakaipuhanon para sa proyekto.
Maski suportado ni Sen. Erwin an obheto kan proyekto na matao nin kadakol na oportunidad para sa mga Pilipino, tinawan-doon kaini na dapat ipaliwanag kan mga ahensiyang sangkot kun paano tutugunan an pangangaipo kaini sa tubig asin kuryente.
Enot nang sinabi kan Bases Conversion and Development Authority (BCDA), na mamamahala sa proyekto, na gagamiton kan Pax Silica Hub an tubig-uran tanganing dai maagawan nin suplay nin groundwater an komunidad.
Alagad sinabi kan Senador sa BCDA na dapat maglatag ini nin malinaw na plano tanganing masiguro na sapat an tubig asin kuryente para sa proyekto, na dai napapabayaan an pangangaipo kan mga residente.
Hinagad man kan Senador sa Department of Energy na ipaliwanag kun sain maghahale an kuryente para sa proyekto asin kun igwa nin posibilidad na maapektuhan an suplay sa mga pagtaraid na lugar.
Binanggit man ni Tulfo an mga reklamo na nareresiber gikan sa nagkapirang local government units asin an mga pangamba kan mga indigenous community sa Tarlac.
Sigun sa BCDA, an Pax Silica Hub sarong inisyatibo kan 35 nasyon na obhetong na pakusugon an global supply chains kan mga critical minerals na ginagamit sa semiconductors, artificial intelligence, asin iba pang advanced technology industries.
