Apektado na kan labi 300, 000 hectares an bushland sa Victoria, Autralia huli sa mahewasang bushfire na pinalala kan matinding heatwave, sigun sa mga awtoridad kan nakalihis Sabado.
Sa New South Wales, pirang kasulo harani sa border kan Victoria an nasa emergency level na, an pinakahalangkaw na alert level, na haros nagpakol sa 40 Celsius an temperatura, sigun sa Rural Fire Service.
Sigun sa mga awtoridad, labi 130 istruktura na an apektado, kaibahan an mga harong, kun saen damay man an poco mas o menos 38,000 na kaharongan asin negosyo na nawaraan nin kuryente huli sa danyos kawsa kan bushfire.
Ini na an pinakamatinding kasulo sa nasyon puon 2019-2020 Black Summer Fires, na nagtupok sa kasing hewas kan Turkey asin ikinagadan kan 33 katawo.
Nagpaabot man nin abiso si Prime Minister Anthony Albanese na naghahampang an Autralia sa sarong “extreme asin dangerous” fire conditions, partikular sa Victoria kun saen dakulang parte kan estado an pigdeklarar na disaster zone.
Komo pag-iingat pigsarado na an dakulang parke asin campground sa Victoria asin tolos na pigsugo an page-evacuate sa mga residente sa lugar.
Padagos an heatwave warning sa dakulang parte kan Victoria, asin aktibo man an fire weather warnings sa dakol na lugar sa nasyon, kaibahan an New South Wales, sigun sa Australian Weather Bureau.
