Nag-aandam na an Barangay Balatas sa pagdagsa kan mga paratinda katakod kan maabot na Peñafrancia Festival sa Ciudad nin Naga.
Sa intrevistra kan Bombo Radyo Naga ki Kapitan Ferdinand V. De Hitta, Barangay Balatas Naga City, sinaysay kaini na nagpoon kan Setyembre 1 an pagtao nin barangay business permit sa mga paratinda na mapasiring sa lugar, partikularmente sa may Calabasa-Balatas Road, kun saen an mga regular na paratinda taon-taon nagtitinda kan saindang mga paninda.
Sinabi ni De Hitta na nagkakantidad nin P200 an business permit, mantang nagkakantidad nin P50 an cedula. An espesyal na permiso magigin balido sagkod sa katapusan kan Setyembre.
Mientrastanto, padagos man an pakikoordinar kan barangay sa mga paratinda para ma-organisar an saindang mga booth asin masiguro na dae madisturbo an dalagan kan mga tawo asin lunadan sa lugar.
Kabali sa mga mamonitor sa mga paratinda iyo an Public Safety Office, Philippine National Police (PNP), City Treasurer’s Office asin Barangay Balatas, bilang parte kan preparasyon para sa marahay asin ligtas na pag-uulay kan Peñafrancia Festival.
