Namunundo an Barangay Kapitan kan Barangay Sagurong Pili Camarines Sur, huli sa 95% kan mga apektadong residentes kan Sagurong Pili an dai nag-atinder sa ginibong pag-urulay sa pag-ultanan kan Gobernador kan Probinsya asin mga apektadong residentes kan konstruksyon kan Iconic Capitol Building sa banwaan nin Pili, Camarines Sur.
Sa intrevista kan Bombo Radyo Naga ki Barangay Captain Romeo Plegino, personal ining nagsurat ki Gov. LRay Villafuerte tanganing magkaigwa nin konsultasyon asin masolusyunan an problema alagad sigon sa opisyal, sinulsulan kan balyong lado an mga residentes tanganing dai mag-atinder sa ginibong pag-urulay.
Dagdag pa kan opisyal na baku man kakulangan an dai pag-atinder kan kadaklan alagad an magayon na pig-oopresir kan Gobernador asin Kun nag-atinder kuta na an kadaklan, babayadan na ni Gov.Lray an mga paraoma na kun sain iyo an huring ipinaluwas na order kan Korte Suprema.
Kinumpirmar ni Kapitan Plegino na an apat na nag-atinder sa pag-urulay iyo an ipaprayoridad kan Capitolyo asin an mga dai nag-atinder, sinda na an bahalang mag follow up kun ano an saindang gigibuhon huli ta sigon sa Kapitan, yaun ini sa pagtabang sa mga residentes sa tabang kan nagkapira pang Barangay Kagawad kan saindang Barangay.
Mientrastanso, an ibang mga Barangay Kagawad na nagtatabang sa mga residentes mayo man nin stand, mayung pinangakkaputan asin mayung alternatibong paagi tanganing magkaigwa nin konsultasyon sa Capitolyo asin kamawotan sana kan mga ini na lumaban an mga residentes asin magkaigwa nin kaanggutan kontra sa construction kan Iconic Capital Building.
Dugang pa kan opisyal na tama an itinaong kantidad kan Gobernador huli ta aprubado ini kan Korte Suprema. Apwera sa libreng pabahay sa Blue House, tatawan pa nin trabaho an mga residentes tanganing dai maapektaran an saindang hanap buhay.
Kadakol pang mga i-opresir an Gobernador alagad dai man pinipirit an mga residentes na habong makisumaro sa boot na mangyari ni Gov. LRay Villafuerte. Pangapodan na sana ni Kapitan Plegino na antes kutang nagdesisyon an mga residentes, nag-isip muna sinda huli ta nagkaigwa na sinda nin pag-urulay sa Barangay Assembly asin mayu na nin magiginibo an Kapitan kun dai na liwat magkaigwa nin tsansa na makaulay pa si Gov. LRay Villafuerte.
