Sarong barangay an ma-implementar nin 4-day workweek bilang simbag sa direktiba kan gobyerno nasyonal asin tanganing makatipid sa konsumo nin kuryente, orog na sa paggamit nin mga air-conditioned units.
Sa intrevista kan Bombo Radyo Naga ki Lorradel Alamo (Barangay Captain, San Jose, Pili, Camarines Sur), mapoon na ngunyan na Abril an bagong schedule kun sain ma-duty an mga empleyado poon alas 7:30 nin aga hasta alas 6:30 nin banggi. sa laog nin apat na aldaw kada semana. An katuyuhan iyo na mamantenir an serbisyo publiko mantang binabawasan an gastos sa enerhiya.
Mientrastanto, nag-implementar man nin mga lakdang an barangay tangarig matabangan an mga padyak drivers na grabeng naapektaran kan presenteng krisis sa ekonomiya. Sa ginibong pagtiripon kaiba an saindang asosasyon, ipinahayag kan mga drayber an saindang kadipisilan sa pagkua nin business clearance huli sa kawaran nin kita.
Bilang kasimbagan, an pamayo kan barangay, kaiba an sarong kagawad, nagdesisyon na personal na mag-abaga nin parte kan bill. Hale sa total na gastos na 280 pesos para sa business clearance, 200 pesos na sana an babayadan kan mga drayber, mantang an natadang P80 papasanon ninda hale sa sadiri nindang bulsa.
Sa ngunyan, igwa nang 25 aktibong miyembro kan padyak driver association sa nasabing barangay. Sigon ki Alamo, dakulang tabang an inisyatiba na ini sa pagpapadagos kan saindang negosyo, urog na ta kadaklan sa mga ini pig-uuna an pang-aro-aldaw na pangangaipo arog kan pagkakan kan saindang pamilya.
Dugang pa kaini na dawa igwa nang existing ordinansa dapit sa bayad, mas pinili nindang magtabang sa abot kan saindang makakaya tanganing maibanan an kasakitan na inaagihan kan saindang mga constituentes. Nagpuon na ngunyan na semana an pagproseso kan mga business clearance para maseguro an padagos na operasyon kan mga padyak sa barangay.
