NAGA CITY – Padagos an pagtabang kan Bureau of Fisheries and Aquatic Resources – Bicol sa sektor kan mga parasira partikularmente sa mga labing gayong nagtitios.
Sa entrevista kan Bombo Radyo Naga ki Wheng B. Briones, Spokesperson – BFAR Bicol, sinaysay kaini na padagos an saindang pigsasagibong mga interventions asin mga livelihood projects na pigtatao sa mga parasira sa rehiyong Bicol.
Dugang pa kaini na an Bureau of Fisheries and Aquatic Resources (BFAR) Special Area for Agricultural Development (SAAD) Program, an programang igwang obhetong mas matabangan an mga parasira na mailangkaw an lebel kan saindang mga kabuhayan orog na an mga labing nagtitios.
Sigun pa ki Briones igwa sindang manlaen-laen na interventions siring na sana kan nakalihis na semana, an BFAR-SAAD nagkundusir nin training dapit sa fiber glass boat making na ginanap sa probinsiya nin Albay, kun saen digde man pigtukduan an mga parasira na na maggibo fiber glass reinforce plastic boat boot sabihon, ini soboot an makabagong materyales na mas durable sa lambang mga parasira.
Sa nasambitan man na training, pigtawan digde nin dakulang kapasidad an mga parasira na makagibo nin bangka asin enkaso man na may raot an saindang mga bangka aram ninda na kun pano ini papakarhayon.
Pigtawan-duon pa ni Briones, na apwera sa mga pa-training pigtawan man soboot kan ahensiya sa irarom kan SAAD program an mga parasira nin livelihood na igwang kantidad na labi P200,000 tanganing masustenir asin maipautob an sustainable aquaculture.
