NAGA CITY- Padagos an pagmonitor kan BFP-Goa sa mga nagpapabakal nin paputok sa saindang banwaan.
Sa entrevista kan Bombo Radyo Naga ki Fire Senior Inspector Vincent Albert Garchitorena, Munical Fire Marhal BFP Goa, sinaysay kaini na nagkundisir an saindang mga personahe nin inspeksyon sa designated area para sa bentahan kan paputok.
Sigun sa opisyal, partikular na saindang pigbabantayan an mga paratienda na nagpapabakal nin paputok sa mga kaakian nin huli ta bawal ini asin enkaso igwang nanunutaran an tolos na piggigubuhan nin aksyon.
Dugang pa kaini, may mga klase kan paputok na delikado sa publiko orog na sa mga kaakian kun kaya dapat regular na nababantayan asin dapat nagsusunod digde an mga paratienda.
Sa oras kaya na igwang madakop na nagbalgar digde an igwang kakahampangon na kapadusahan.
Katakod digde, kun ikukumparar soboot sa mga nakalihis na taon an bentahan ngunyan nin paputok an medyo nagluya nin huli ta nabago naman an paagi nin pagselebrar kan kapaskuhan asin bagong taon sa presenteng panahon.
Mientrastanto, pinagirumduman man kaini an publiko na sunudon an mga tips kun pano makakalikay sa kasulo ngunyan na holiday season.
Sa ngunyan, naka-standby na an mga personahe kan BFP Goa siringman an saindang mga gagamiton na fire trucks tanganing tolos na makapagresponde enkaso kaipuhanon.
