NAGA CITY – Dead-on-the-spot ang isang binata matapos pagbabarilin ng hindi pa nakikilalang suspek sa Brgy. Madulao, Catanauan, Quezon.
Kinilala ang biktima na si Vincent Cabangon, 22-anyos, residente ng nasabing lugar.
Sa nakalap na impormasyon ng Bombo Radyo Naga sa Quezon Police Provincial Office, napag-alaman na habang naghihintay ang biktima at ang tito nito na si Eric Cabangon ng van sa nasabing lugar nang bigla na lamang dumating ang isang kulay pula na motorsiklo sakay ang dalawang indibiwal.
Dito na umano bumaba ang isa sa mga ito na nakasuot ng itim na jacket at asul na sumbrero at bigla na lamang pinagbabaril ang biktima na naging dahilan ng agaran nitong kamatayan.
Sa ngayon, patuloy pa rin ang isinasagawang imbestigasyon ng mga awtoridad gayundin ang pagtunton para sa posibleng kinaroroonan ng nasabing mga suspek.
