Aram baya nindo mga ka-bombo, sarong 14-anyos na lalaki an kasuarin sana ginana an reklamong pigsunad kontra sa saiyang mga magurang.
Susog sa report, an dae na pinangaranan na binatlyo kaibahan an saiyang abogado nagsunad nin kaso sa London Court of Appeal kun saen nakapalaog na kan nakalihis na Marso kan 2014, ini an pigdaya kan saiyang mga magurang sa pagbalyo sa Ghana.
Istorya kan binatilyo, pigsaysay kan saiyang mga magurang na mabisita sana soboot sinda sa kapamilya na igwang helang sa Ghana alagad saiyang napag-araman na pig-enroll na ini sa sarong boarding school sa Africa.
Sa ibong kan pagpirit kan the 14-anyos na binatilyo na magbalik sa London, dae ini pigtugutan kan saiyang mga magurang kun kaya naghanap nin abogado asin nagsunad nin kaso sa korte.
Sa enot, an halangkaw na korte sa London nagpabor sa mga magurang kan binatilyo huli ta mawot sana man kan mga ini an marhay para sa saindang aki alagad basado man sa Court of Appeal nabayolar an derechos kan aki na magpili kun saen kaini mawot na mag-istar.
Sigun sa abogado kan binatilyo, kadakol na proseso pa an pighihiling sa kaso na ini tangani soboot na magin pantay asin marhay an kakaluwasan kan sitwasyon.
Mientrastanto, an 14-anyos na binatilyo an nagtitinir sa Ghana, alagad an saiyang abogado naglalaom na an desisyon kan Court of Appeals an dakulang lakdang tanganing makabalik ini London.
Sa ngunyan, an kakaibang kaso na ini an pighihiling na posibleng magkaigwa nin epekto sa international family law.
