Pormal nang nagsunad nin kaso an OPM girl group na BINI, kaibahan an saindang abogadong si Atty. Joji Alonso, kontra sa sarong indibidwal katakod kan soboot pagbalgar sa Cybercrime Prevention Act asin “unjust vexation” o nagtutukoy sa anuman na gibuhon kan sarong tawo na mayong bastanteng rason o legal na basehan, alagad nakakaabala asin nakapagdadara nin mental o emosyonal na perwisyo sa iba, maski mayong pisikal na pangungulog.
Ipigsunad an reklamo kasuodma, Lunes, Agosto 18, sa sa Hall of Justice sa Sta. Rosa, Laguna.
Sigun ki Atty. Joji, an kaso an bakong libel kundi pagbalgar sa Article 287 kan Revised Penal Code katakod kan Section 4(b) kan RA 10175 o Cybercrime Prevention Act of 2012.
Nag-ugat an reklamo gikan sa sarong pinalipot na video kan BINI mantang nagkakakan nin street food.
Sigun sa abugado, pinutol an orihinal na 25-minutong video asin ginibong 2 minuto sana, kun saen puro negatibong reaksiyon an ipinahiling.
Huli digde, nagdara ini nin salang impresyon sa publiko.
Huli man sa nasambitan ng video, nakaeksperyensiya an mga miyembro kan BINI nin matinding online bashing, pagbabanta, asin personal na paninirang puri na nakaapektar sa saindang mental asin emosyonal na kamugtakan.
Dugang pa ni Alonso, an lakdang na ini kan BINI an mensahe kontra sa online bullying asin pangraraot na panahon na soboot tanganing mauntok an siring na klase kan pang-aabuso online.
Kun mapapatotoohang nagkasala, an respondent an pwedeng makulong nin anom hasta 12 taon, Naghahagad man an kampo kan BINI nin sanyos na P1 million para sa lambang miyembro kan grupo.
