Pormal nang ikinundisir kan mga stakeholder hale sa industriya nin ube an sarong pambansang pederasyon na magsisilbing kinatawan asin magtatao nin direksyon sa mga polisiya para sa industriya, kasabay kan padagos na pagsikat nin mga produktong gibo sa ube.
Inapod kan United Ube PH Association Inc., layunin an pambansang organisasyon na pakusugon kan representasyon, magtao nin mas malinaw na direksyon, asin magbilog nin sarong nagkakasarong pambansang pagkakakilanlan para sa industriya kan ube.
Kabali sa mga miyembro an mga parauma, kooperatiba, nagtatanom nin ube, processor, trader, exporter, researcher, mga institusyong pang-akademiko, ahensya kan gobyerno asin iba pang stakeholder sa industriya tanganing suportahan an industriya kan ube sa nasyon.
Sa pahayag ni Agriculture Secretary Francis Tiu Laurel Jr., an organisasyong ini an nagtatao sa industriya kan ube nin mas makusog na tagapagsulong asin mas malinaw na agihan patungo sa merkado.
Dugang pa kaini, nais kan mga ini na magin saro an Philippine ube sa mga primerong produktong pang-export kan nasyon. Suboot, kaipuhan pakusugon an industriya tanganing matugunan an pandaigdigang demand mantang sinisiguro na mas dakulang parte kan kita hale sa produkto an mapapadara sa mga paraoma.
Opisyal nang nakarehistro sa Securities and Exchange Commission an United Ube PH bilang sarong non-stock, non-profit organization na kumakatawan sa industriya kan ube sa Pilipinas.
Poon kan mabilog ini, nakikipagtabangan na an grupo sa mga ahensya nin gobyerno, lokal na gobyerno, business organizations asin iba pang stakeholder tanganing magbilog nin mga konkretong estratehiya para mapakusog an industriya.
Layunin man kan United Ube PH na palawakon an mga merkado asin partnership sa mga institutional buyer. Kabali igdi an pakikipag-ulay sa mga Philippine asin German business chamber asin pagbilog nin panghaluyang kasunduan sa supply asin pagbakal nin ube.
Mabilog man an grupo asin Department of Agriculture nin sarong bilateral agreement tanganing mapakusog an kooperasyon kaini asin matukoy an mga posibleng magkasanib na programa.
Mientrastanto, ipinepreparar na an sarong pambansang estratehiya para sa pagpapaunlad kan industriya nin ube, kasabay kan isinasagibong membership drive.
Gaganapon din sa Pagadian City, Zamboanga del Sur, sa Setyembre an primerong National Ube Forum na dadaluhan kan mga stakeholder asin kinatawan nin mga ahensya kan gobyerno.
Lalahok man an grupo sa ASEAN Health Tourism and Wellness Economy Summit, kun saen ipapabisto an mga produktong ube kan Pilipinas asin makikipag-takod sa mga potensyal na buyer, investor asin business partner.
Padagos na sinisikap kan nasyon na mapakinabangan an nagdadakulang kasikatan nin mga produktong ube sa lokal asin pandaigdigang merkado. Plano kan gobyerno na maglaan nin ₱300 milyon sa masunod na taon tanganing mapalangkaw an produksyon asin mapakusog an suporta sa industriya kan ube.
