Nahanap na kan mga miyembro kan pigbilog na search team an black box kan Azerbaijan Airlines flight J2-8243, an passenger plane na nagbagsak sa syudad kan Aktau sa Kazakhstan.
An black box sarong plane device na igwa nin mga impormasyon dapit sa flight, airspeed, altitude, oras kan biyhae, asin iba pang importanteng impormasyon dapit sa biyahe kan mga eroplano.
Segun pa ki Kazakhstan Deputy Prime Minister Kanat Bozumbayev, sarong komisyon na an pigbilog tanganing pangenutan an imbestigasyon sa plane crash.
Mayor na susurion kan mga ini an natunton na black box, kabali na an iba pang natipon na pidaso nin ebidensiya. Matabang man an nasambitan ng komisyon sa pamilya kan mga nagadan na pasahero, kabali na an mga nakasalbar.
Segun pa ki Bozumbayev, nakapreparar an nasambitan ng komisyon asin an gobyerno kan Kazakhstan na makipagtabangan sa mga Azerbaijan authorities na piglalaomang masagibo man nin pagsisiyasat sa insidente.
Sa presente, nakua na an gabos nin mga bangkay gikan sa crash site. Basado sa opisyal na datus kan Kazakhstan, 29 na indibidwal an kumpirmadong nakasalbar, duwa digde an mga kaakian. Nag abot man sa 38 katawo an kumpirmadong gadan.
