Nakaalerto na man pati an Royal Thai Navy makalihis na nilaog kan Cambodian naval forces an kadagatan na sakop kan Trat, Thailand.
Susog sa report, nanutaran kan Thai Navy an Cambodian Naval forces bandang mag oomagahon kan Sabado, Hulyo 26 asin nagkaigwa nin ribayan nin putok gikan sa magka-ibong na kampo.
Nagpuon na umatake an tropa kan Cambodia alas-5:10 pagkaaga sa Chamrak area sa probinsiya nin Trat. Marikas man na rumesponde an mga suldados kan Thailand na nakabase sa Chanthaburi-Trat Border.
Naglunsar nin operasyon an Royal Thai Navy sa “Trat Phikhat Pharai 1” tangani pabalikon asin rauton an posisyon kan Cambodian military na naglaog sa tulong lokasyon na sakop kan Thai territory.
Alas-5:40 nin pagkaaga kan dagusang mapahali kan Thai naval forces an presensiya kan Cambodian military sa saindang nasasakupan. Ini an pantulong aldaw kan engkwentro sa pag ultanan kan mga military kan Cambodia asin Thailand.
Napagraman na an tensyon sa pag-ultanan kan Thailand asin Cambodia an may labi sa sarong siglo nang kasaysayan, na nagpuon pa kan panahon nin kolonyalismo.
Alagad an liwat na pagsiklab nin kadahasan ngunyan na taon an nagpuon man kan nakalihis na Mayo 28, 2025, kun saen sarong Cambodian soldier an nagadan sa sagupaan sa Emerald Triangle, na parehong inaangkin kan duwang nasyon.
Enot na parte kan Hulyo 2025, nagkaigwa nin airstrikes, artillery exchanges, asin pagbomba sa mga border villages.
Rinibong sibilyan an nag ebakwar asin kadakol na nasyon na an nangapudan para sa katrangkiluhan sa pag ultanan kan magkataid na nasyon.
