Prayoridad kan Canada an pagpapahewas kan kalakaran sa Asya, na pigkokonsiderang pinakamakaskas na nag uusbong na rehiyon sa kinaban.
Segun kay Canadian Prime Minister, Mark Carney target na matapos ngonian na taon an negosasyon para sa Canada-ASEAN Free Trade Agreement sa irarom kan pamumuno kan Pilipinas sa ASEAN.
Dagdag pa ni Carney, piglalaoman na magpapababa o tuluyang maghale kan mga mga taripa an kasunduan, na magtatao nin mas darakulang oportunidad sa mga negosyo asin mga obrero kan Canada.
Pighayag pa niya na mawot kan Canada na matapos ngonian na taon an negosasyon para sa sarong hiwalay na kasunduan sa kalakaran sa pagultanan kan Pilipinas asin Canada.
Tinawan doon pa ni Carney na an Pilipinas saro sa pinakamakaskas na nag uusbong sa ekonomiya sa Asya asin sa bilog na kinaban.
