Sumampa si Alex Eala sa panibagong career-high na No. 24 sa WTA live rankings makalihis makalaog sa finals kan Mubadala DC Open na tig gaganap sa Washington DC sa Amerika.
Umangat si Eala nin apat na puntos hali sa saiyang dating puwesto na No. 28 nganing makua an saiyang bagong career-high position.
Naka kolekta si Eala nin 265 puntos nganing madagdagan an saiyang kabuuang puntos na 1,931.
Malangkaw pa ini kung makukua ni Eala an kampeonato sa Mubadala DC Open.
Sa paglaog kaini sa finals, nakasisigurado na si Eala sa tumataginting na $155,000 o katumbas kan P9.3 milyon base sa exchange rate na P60 kada $1 dolyar.
Madakula pa ini sa $252,000 o mahigit P15 milyon kun makukua ni Eala an kampeonato sa Mubadala DC Open.
Segun paman, dae makukuha ni Eala nin buo an mga nabanggit na prize money huli sa mababawasan pa ini nin tax kaiba pa an mga coaches fee asin iba pang gastuson kan saiyang team.
Makalihis an Mubadala DC Open, tulos na tutulak si Eala sa Toronto, Canada para man sa National Bank Open na sarong WTA 1000 event.
Kapot ni Eala an No. 25 seed sa National Bank Open kaya makasisigurado na ini sa opening round bye.
Dakulang tabang ini para makapagpahingalo pa si Eala antes sumabak
sa National Bank Open lalo pa mabyahe pa ini puon Washington pasiring Toronto.
