NAGA CITY- Nagpuon na ngunyan na aldaw an kick off activity para sa CANR Festival 2025 na pig-organisar kan CBSUA-Pili.
Sa nagin paghampang sa mga kagawad kan media ni Dr. Lorena Hernandez, Professor VI kan College of Agriculture and Natural Resources, CBSUA-Pili, sinaysay kaini na nasa 3,480 na estudyante kan College of Agriculture and Natural resources an kabali sa nasambitan ng aktibidad.
Highlights digde an tolong programs na pigtatangro sa lado kan College of Agriculture and Natural Resources kun saen binaranga sa 11 teams an mga estudyante.
Katakod kaini, pigkundusir an grand parade pasado alas 7:30 nin aga gikan sa Bagong CANR building pasiring sa Agriville, CBSUA.
Sigun ki Hernandez, obheto kan nasambitan ng event na ma-develop an interest asin ma-inspire an mga joven na henerasyon na mag-venture sa agriculture nin huli ta igwa digdeng magayon na futuro an mga kajovenan.
Dugang pa kan opisyal, taon-taon pigkukundusir an siring na selebrasyon na nagseserbeng aplikasyon kan mga estudyante sa saindang mga nanudan sa laog kan classroom.
Sa paagi pa kan CANR Festival nagkakaigwa nin ideya an mga estudyante dapit sa kun anong negosyo an saindang mawot na laugan asin iba pang mga magagayon na innovative ideas.
Mientrastanto, sa mga masunod na aldaw, igwang nakalatag na mga aktibidad siring kan awarding sa mga outstanding alumni asin an mga booth na pwedeng bisitahon kan mga makikisumaro. Sa ngunyan, madurar an nasambitan ng Festival hasta sa Abril 4, 2025.
