NAGA CITY- Pigkumpirmar kan Taiwanese maritime authorities na pigtapaan kan 2 Chinese vessels an sarong Taiwanese fishing vessel na Tachinman 88 kan Martes nin pagkabanggi harani sa Kinmen archipelago na diit sana an distansiya gikan sa baybayon kan China algad kontrolado kan Taiwan.
Nagsampa soboot an mga personahes kan Chinese Coast Guard sa nasambitan ng bangka kan Taiwan saka ini dinara sa sarong daungan sa mainland China.
Tolos man nag-deploy an Taiwan nin 3 barko para i-rescue an Tachinman 88 alagad saro sa mga ini na nagibong makarani sa fishing boat an tinapaan kan Chinese boats asin sinabihang dae mangiaram.
Napiritang iuntok kan lado kan Taiwan an pag-rescue sa nasambitan ng fishing boat tanganing malikayan an paglangkaw kan tensiyon makalihis na ma-detect kan Taiwan maritime authorities an 4 pang Chinese vessels na paparani sa saindang direksiyon.
Sa sarong statement, nangangapodan man an Taiwan Coast Guard sa China na likayang maimbwelto sa political manipulation asin likayan na maraot an cross-strait relations asin palibrehon an Tachinman ship asin crew kaini sa orog na marekas na panahon.
SIgun sa Official News Agecy kan Taiwan, igwa nin lunad na 6 na crew an nasambitan ng fishing boat kabali an kapitan asin 5 migrant workers.
Dae naman malinaw an dahilan kan nagin aksiyon kan CCG alagad ini an posibleng igwa nin ikinaraman sa tensiyon sa pag-ultanan ninda kan Taiwan na pig-aaking kaining parte kan saindang teritoryo.
Marurumdoman, na kan Pebrero kan presenteng taon, pinaigting pa kan China na nag pagpapatrolya sa nasambitan ng katubigan makalihiss na malamos an 2 parasisirang Chinese mantang pighahapag an Taiwanese Coast Guard sa may kadagatan kan Kinmen.
