Pwede soboot magsunad nin impeachment complaint an mga mamamayan kontra sa mga miyembro kan Korte Suprema.
Ini an inihayag ni dating congressman asin presenteng Liberal Party (LP) acting president Lorenzo “Erin” Tañada III makalihis na makaguno nin batikos gikan sa publiko an nagin desisyon kan Kataas-taasang Hukuman an idineklarang pagbalgar sa ley an articles of impeachment kontra ki Vice President Sara Duterte.
Pwede kaining i-cite komo grounds sa reklamo an pagbalgar sa Article XI kan 1987 Philippine Constitution na nagsasaysay kan Accountability of Public Officers asin naglalatag kan impeachment procedure na maikokonsidear na responsable sa pagbalgar sa Saligang Batas.
Kun dae man soboot, pwedeng magin grounds an betrayal of public trust para sa dae pagpapairal kan Article XI.
Nagtutubod man si Tañada na dae mahantong sa constitutional crisis an pagsusunad kan impeachment complaint kontra sa mga hukom kan Korte Suprema huli ta nagibo na man ini kaidto.
Alagad, piglinaw ni Tañada na dae ninda pigbubusol an nasambitan ng aksiyon kontra sa korte kundi saro sana soboot ining opsiyon na pwedeng gibuhon kan mamamayan kan nasyon.
An hapot soboot ngunyan, kun igwa bayang lehislador gikan sa Kamara de Representantes an magi-endorso kan impeachment complaint kun enkaso.
Ginibo kan dating lehislador an pahayag sa sarong press conference kan mahapot kun ano an pwedeng magibo kan mamamayan kun nahihiling nindang unconstitutional an nagin desisyon kan Korte Suprema.
Mientrastanto, nagtutinod man an LP acting President na an pag-archive sa articles of impeachment an dae boot sabihon na gadan na ini kung ipigbugtak sana ini sa library o vault na pwedeng iluwas enkaso igwang makakaapektar sa kaso.
