Pigbubusol ngunyan ni Akbayan Partylist Representative Jose Manuel ‘Chel’ Diokno an pagsasairarom sa audit kan mga proyektong pigkaputan kan mga contractors na nasa irarom ngunyan kan Witness Protection Program (WPP).
Sigun ki Diokno, obheto kaini an hararom na pagsusuri kun gurano kadakula an pondo na pigtagama sa mga proyekto na ini asin kun gurano kadakula an nakua kan mga ini gikan sa public funds.
Marurumduman kaya na apat na mga kontraktors an pigkaaga sa irarom kan WPP na pigbisto komo sinda dating Department of Public Works and Highways (DPWH) Usec. Roberto Bernardo, dating DPWH Bulacan First District Engr. Henry Alcantara, DPWH Engr. Gerard Opulencia asin an kontraktor na si Sally Santos na iyong may sadiri kan SYMS Construction Trading.
Paliwanag ni Diokno, antes pa dapat ikaag an mga ini sa irarom kan protection program nakua na sa sainda an mga electronic devices na posible may laog kan mga impormasyon kan mga proyektong saindang pigkaputan asin mahihiling man soboot digde an mga nagin ka-konchaba kan mga ini sa pag-magic soboot sa mga proyekto.
Kun talagang bilog an saindang pakikisumaro asin kooperasyon sa imbestigasyon sa mga anomalyang nagpapatos sa flood control scandal dapat gabos kan aram ninda dapit digde asin magin sa iba pa soboot na mga infrastructure projects pigluwas asin pigbulgar na ninda sa ngayon.
Dugang pa kan kongresista, kun siisay an mga sangkot sa anomalya na nasa saindang kaaraman asin dapat man nindang sabihon nin buo sa Department of Justice (DOJ) asin itestigo sa korte.
Mientrastanto, marurumduman man na makalihis na maikaag sa protection program an apat na kontraktor nagbalik na man nin haros milyon-milyong salapi sinda Alcantara asin Opulencia komo pagpapahiling kan saindang bilog kooperasyon sa imbestigasyon.
