NAGA CITY- Pigpagirumdom kan Comelec-Calabanga an mga botante na dapat ingatan nin marhay an balota nin huli ta mas manipis ini kumparar sa dating ginamit kan nakalihis na eleksyon.
Sa entrevista kan Bombo Radyo Naga ki Emilia Queng Bueza, Election officer kan Comelec Calabanga, sinaysay kaini na enkaso ma-shade kan balota, dae soboot masyadong iduon nin huli ta an marka kan ink an matala sa likod na makawsa nin kariribungan sa machine enkaso isalang asin ini an iluluwa.
Sigun pa sa opisyal, kaipuhan na panuon an pag-shade alagad kun kabanga sana an na-shadan bibilangon pa man giraray ini kan machine basta nag-abot sa 10% threshold.
Likayan soboot na matamaan an security markings nin huli ta ini an maiin-validate.
Dugang pa kan opisyal, sa mga pasmadong kamot, antes na mag fill-up kan balota punasan muna ini tanganing dae magkaproblema.
Pigtawan duon pa kan opisyal na dae pwedeng mag over vote an mga botante alagad pwede mag under vote, dae man pwede na kuanan nin ladawan an balota asin dae pwedeng iluwas sa presinto.
Apwera digde,pigsaysay pa ni Bueza na botante an masalang kan balota tanganing malikayan an mga dayaan.
Sa ngunyan, kamawotan na sana kaini na magin matuninong an ikukundusir na 2025 National and Local Elections.
