NAGA CITY – Pig-sierto kan COMELEC Caramoan na papanimbagon an siisay man na indibidwal na mapatotoohang nagpapabakal asin nagbabakal nin boto.
Sa entrevista kan Bombo Radyo Naga ki Dennis Gomez, Comelec Officer kan Caramoan, Camarines Sur, sinaysay kaini na sa saindang banwaan, kumpirmadong nairehistro an insidente kan Vote buying.
Sigun ki Gomez, sa saindang pigsagibong operasyon kaibahan an mga kapulisan, nanutaran ninda an mga nagtatao kan mga ipinagbabawal na card alagad, mayo pa soboot an aktong pagtatao nin kwarta kun kaya limitado sana an saindang piggibong lakdang.
Dugang pa ni Gomez, magin sa ibang banwaan an igwa man nin mga nairereport kan siring na insidente.
Mientrastanto, pigtawan-duon man kan opisyal na an kaso kan vote buying an bako sanang kandidato an dapat basulon, alagad magin an mga botante na nag-aako kan kwarta.
An mga mapapatotoohan man na nagpapabakal asin nagbabakal nin boto an pupwedeng mahampang sa pagkakakulong, asin disqualification sa kandidato.
Katakod kaini, pigpagirumdoman na sana kan opisyal an mga botante ngunyan na pirang aldaw na sana antes an pirilian, na gibuhong sagrado an saindang boto, asin dae magpadara sa marekasang kaginahawaan orog na ta bako soboot ini an solusyon sa huma asin problema na kinakahampang kan nasyon.
Siringman, pilion an kandidatong masirbi komo tapat na public servant na matao nin mga serbisyo asin programa na kaipohan kan publiko.
