NAGA CITY- Nagpatanid an Comelec Naga sa mga kandidato na likayan na mag-atender sa mga distribusyon nin ayuda kan DSWD.
Sa entrevista kan Bombo Radyo Naga ki Atty. Maico Julia Jr, Election Officer kan Comelec Naga, sinaysay kaini na maikokonsederar na vote buying enkaso manutaran an mga kandidato sa mismong pay out kan mga ayuda na pigmamanehar kan DSWD.
Sigun pa ki Julia, bawal man an mga campaign materials sa lugar kun saen ikukundusir an pay out huli ta saro pa ini sa mga ipinagbabawal kan komisyon.
Pigtawan duon kaini na dae pwedeng gamiton an anuman na government resources sa saindang pangangampanya huli ta dae man ini naka-alokar para sa isay man na kandidato maski pa nasa posisyon.
Katakod digde, an mga kandidato na mabalgar sa panundunan an mahahampang sa magkakanigong kapadusahan asin posibleng ma-disqualify sa saiyang pigdadalaganan na posisyon.
Dugang pa kan opisyal, aram naman kan DSWD an saindang obligasyon orog na an mga bawal asin dae sa panahon kan eleksyon kaya naglalaom sinda na malilikayan an mga pagbalgar.
Mientrastanto, mapuon naman sa aga an training kan mga electoral board na maserbe sa eleksyon tanganing saindang makabisado an mga gibuhon.
