Padagos an pag-andam kan Commission on Elections (COMELEC) sa syudad nin Naga para sa maabot na Barangay and Sangguniang Kabataan Elections (BSKE) 2026 sa ibong kan mga kahaditan sa posibleng pag-uktaba kaini.
Sa intrevista kan Bombo Radyo Naga ki Atty. Maico Julia Jr. Election Officer kan Comelec Naga, nagpapadagos an voter registration asin nakatalaan na matapos sa Mayo 18, 2026.
Sa ngunyan, labi sa 6,000 na an mga bagong botante an nagparehistro puon kan magpoon an rehistrasyon kan nakaaging Oktubre, asin piglalaoman na madagdagan ini nin poco mas o menos 1,000 hasta 2,000 antes an deadline.
Segun ki Julia, kadaklan sa mga bagong rehistrado gikan sa sektor kan mga jovenes, partikular na an mga nag-eedad 15 hasta 30 anyos na kabale sa mga qualified SK voters sa irarom kan Expanded SK Reform Law.
Piglalaoman man kan COMELEC an paglangkaw kan mga rehistrasyon sa mga huring aldaw kan rehistrasyon, kaya nag-aandam an opisina sa paagi nin pagdagdag nin mga tawohan asin mga computer unit tanganing maparikas an proseso.
An mga komun na problema sa rehistrasyon kabali an kawaran nin mga rekisitos arog kan balidong ID asin sertipiko nin pagkamundag, orog na para sa mga menor de edad na rehistrado. Handa man daa an asistensya para sa mga senior citizens asin persons with disabilities (PWDs).
Kasunod kan pagrehistro kan mga botante, an COMELEC mag-aandam para sa pag-file kan Certificates of Candidacy (COC) sa Setyembre asin an panahon nin kampanya sa Oktubre bago an eleksyon sa Nobyembre 2026.
Dugang pa ni Julia na nagtitinir sa “green category” an Ciudad nin Naga pag-abot sa mga insidenteng may kinaaraman sa pirilian, sarong indikasyon kan matoninong na sitwasyon sa ciudad. Padagos an pakikoordinar kan COMELEC sa Philippine National Police (PNP), Armed Forces of the Philippines (AFP), asin iba pang law enforcement agencies para maseguro an malinig asin ligtas na pirilian.
Igwa suboot nin 21 voting centers sa ciudad, na gabos ginamit na bilang polling place kan mga nakaaging eleksyon.
Nangapudan an opisyal kan COMELEC sa publiko na magparehistro mantang bukas pa an rehistrasyon asin magin selective sa pagpili kan mga iboboto sa maabot na pirilian.
