Padagos an pagpepreparar kan COMELEC-Naga para sa Barangay asin Sangguniang Kabataan Elections (BSKE), kaiba an nakatalaang pagfile kan Certificate of Candidacy o COC.
Sa intrevista kan Bombo Radyo Ki Atty. Maico Julia, Election Officer kan COMELEC-Naga, sinaysay kaini na padagos an pagpepreparar mantang hinahalat an pinal na desisyon manungod sa panukalang pagpapaliban kan halalan.
Segun ki Julia, kun maisasabatas asin lalagdaan kan Pangulo an pagpapaliban kan halalan, susundon kan COMELEC-Naga an kasuguan asin resolusyon kan central office, kaiba an posibleng pagpundo kan pagresibe kan COC.
Pinagirumduman man kaini na kinakaipuhan na personal dapat mag file nin COC sa opisina kan COMELEC asin bawal an online, fax, o postal filing.
An mga kandidato man sa SK dapat 18 hasta 24 anyos sa aldaw kan halalan, mantang 18 anyos pataas naman para sa mga kandidato sa barangay.
Mientrastanto, nakadepende naman sa lokal na pamahalaan asin sa kinakaipuhang pondo an pagpapadagos kan plebisito para sa panukalang pagiging highly urbanized city kan Naga City.
Pig-enkaminar ni Julia an mga kandidato asin publiko na magin updated sa opisyal na anunsyo kan COMELEC manungod sa BSKE asin plebisito.
