NAGA CITY- Pigtawan duon kan alkalde kan siyudad nin Naga na dakula an naitabang kan pagbubugtak nin Complaints box sa nagpapadagos na business one stop shop.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na mas marekas na nasimbagan an mga reklamo sa pag renew asin pagpaparehistro kan mga negosyo sa siyudad.
Sa paagi kan Complaints box saindang nasimbagan an reklamo partikular sa maluyang pagreleaser kan saindang mga permit huli sa pirma kan alkalde. Ginibuhan soboot ini nin paagi asin sa ngunyan positibo man an nagin simbag kan publiko.
Mientrastanto, makalihis an business one stop shop, aasikasuhon kan LGU an mahigot asin massive na pag-check sa mga permit kan gabos na negosyo sa siyudad.
Napag-araman kaya na kadakol na mga negosyo sa Naga City na existing alagad mayong mayors permit.
Pigtawan duon pa ni Robredo na dapat an gabos na negosyo an igwang permit tanganing patas sa gabos.
Sa ngunyan, pighihiling kan opisyal na mas magigin marhay an koleksyon kan lokal na gobierno na magagamit sa mga programa sa pagpapamarhay kan bilog na siyudad.
