Pigkumpirmar kan Cosmoship Management na saro sa limang pinagtutubodang binawian nin buhay sa insidente kan pag-atake kan Houthis rebels sa cargo vessels na Eternity C sa Red Sea an kumpirmadong gadan na.
Sigun sa report, apat pa an pinagtutubodang binawian nin buhay, mantang 10 tripulante an padagos na nawawara makalihis na bayaan an barko na inatake nin pauro-utro kan rebeldeng grupo puon kan nakalihis na Lunes.
Sampulo sa 21 tripulante an naisalbar na, asin padagos an paghahanap sa mga nawawara.
Pigsusuri man kan kumpanya an report kan mga Houthis na igwa sindang naisalbar na cres makalihis na maglubog an barko kan nakalihis na Miyerkules.
Mientrastanto, padagos an search and rescue operations na pigsasagibo kan kumpaniya, asin nangapodan ini sa ibang barko sa luhar na magtabang sa paghahanap.
