Pigkumpirmar ni Philippine National Police (PNP) Chief PGen.Nicolas Torre III na presenteng nasa irarom kan saindang protective custody an whistleblower sa kasong kan mga nawawarang sabungero na si alyas “Totoy”.
Sa sarong press conference na ginanap kasubagong aga sa Kampo Krame, pigtawan-linaw ni Torre na haloy nang nagtatao nin pahayag si Totoy sa saindang opisina pirang bulan na an nakakalihis antes pa magputok an mga bago kaining pahayag mapadapit sa pigkakamugtakan kan mga lawas kan mga sabungero asin magin an mga imbweltong pangaran sa nasambitan ng kaso.
Sigun ki Torre, dae muna ninda ini pigluwas tanganing masierto na dae maeenotan asin mabubutasan an saindang mga pigkakasang imbestigasyon mapadapit sa kaso asin tanganing makakua pa nin mga bastanteng ebidensiya na makakatabang tanganing marekas na maresolbar an kaso kan mga sabungero.
Paliwanag pa ni Torre, dae malantad an mga bagong impormasyon na ini asin magin an nagkapirang mga ebidensiya kun dae sinda nagsagibo kan pig-aapod na ‘under the radar’ na imbestigasyon na iyo soboot nagin dalan tanganing makua ninda sa mga impormasyon presente nindang kapot.
Sa presente an gabos kan impormasyon na saindang nakalap an naisumiter na sa himpilan kan Department of Justice (DOJ) para man sa mga preliminary investigation sa kaso asin berepikasyon kan mga pahayag ni Totoy. Halaton na sana soboot an mga magigin pag-usad sa kaso na dapatbase na sa imbestigasyon kan DOJ.
Mientrastano, si Totoy man an presenteng nasa kustodiya kan PNP asin presenteng naga-apply nin Witness Protection Program tanganing masierto an saiyang seguridad asin kasalbaduhan.
Kun magigin kwalipikado para sa programa, tulos na itu-turn over kan PNP an kustodiya ni Totoy sa DOJ asin pigsierto man kan hepe na an proseso kaini an magigin marekas na sana asin nakasalalay na ki Justice Secretary Jesus Crispin Remulla an magigin kapalaran asin proteksiyon ni Totoy.
Kasunod man kaini, pigkumpirmar man kan jepe na bako sana sa Taal Lake an nagin disposal kan mga lawas kan mga biktima asin presente na sindang nagsasagibo nin mga imbestigasyon sa iba pang mga lugar na dae soboot pinaglagakan kan iba pang mga sabungero.
Nagsayuma man an hepe na banggiton an mga lugar na pwedeng nagin disposal site kan mga bangkay kan nawawarang sabungero, ini an tangani soboot masierto na dae mabuburilyaso an saindang piggigibong efforts tanganing makahanap pa nin mga bastante na ebidensiyang masuporta sa kaso na ini.
Posible kayang igwang maapektarang tawo na pwedeng magin rason tanganing pugolan an mga pigsasagibong eksaminasyon kan kapulisan para sa pag-usad kan kaso kan mga nawawarang sabungero.
Sa presente, pigsierto man kan hepe sa publiko orog na sa mga kaparientes kan mga biktima na naenot nang magbisira sa opisina kan Criminal Investigation and Detection Group (CIDG) kan nakalihis na Biyernes na gigibuhon kan mga kapulisan an saindang makakaya tanganing makapagtao nin hustisya sa saindang kaso asin mailantad an mga personalidad na nasa likod kan pagkidnap asin paggadan sa mga sabungero apat na taon na an nakakalihis.
Mientrastano, padagos mam an mga efforts kan PNP asin pakikipag-koordinar sa DOJ para sa tulos na pagresolbar kan kaso asin tanganing matawan na nin hustisya an pagkawara kan mga sabungero asin magin an mga pamilyang saindang nawalat.
